Nadhom Sejarah singkat Kanjeng Nabi Muhammad SAW

Nadoman nu ngarangkum tentang Sejarah Nabi versi Sunda, mangga simak

1.Nabi urang  saréréa,
Kangjeng Nabi anu mulya,
Muhammad jenenganana,
Arab Kurés nya bangsana.

2
Ramana Gusti Abdullah,
Ibuna Siti Aminah,
dibabarkeunna di Mekah,
wengi Senén taun Gajah.

3
Robiul awal bulanna,
tanggal ka-dua belasna,
April bulan maséhina,
tanggal kadua-puluhna.

4
Ari bilangan taunna,
lima ratus cariosna,
tujuh puluh panambihna,
sareng sahiji punjulna.

5
Siti Aminah misaur,
waktos babarna kacatur,
ningal cahaya mani ngempur,
di bumina hurung mancur.

6
Parangina Kangjeng Nabi,
jatnika pinuh ku puji,
pinter tur gedé kawani,
sabar nyaah ka sasami.

7
Keur opat taun yuswana,
diberesihan manahna,
nabi dibeulah dadana,
malaikat nu meulahna.

8
Jibril kadua réncangna
Mikail jenenganana,
ngeusikeun kana manahna,
elmu hikmah sapinuhna.

9
Tuluy dada Kanjeng Nabi,
gancang dirapetkeun deui,
sarta teu ngaraos nyeri,
dicap ku Hotami Nabi.

10
Rama Nabi kacaturkeun
pupusna kacarioskeun
basa Nabi dibobotkeun
dua sasih kaunggelkeun

11
Kagenep taun yuswana
ditilar pupus ibuna
Nabi dirorok eyangna
Abdul Mutalib asmana

12
Kersana Rabbul’alamin
Kangjeng Nabi nu prihatin
yuswa dalapan taun yakin
éyangna mulih ka batin

13
Sabada wapat éyangna
Nabi dirawat pamanna
Abi Talib kakasihna
sadérék teges ramana

14
Kangjéng Nabi sering pisan
dicandak ka Nagara Sam
sok nyandak barang dagangan
di dinya téh pajeng pisan

15
Kacatur di éta nagri
loba pandita Yahudi
sareng pandita Nasrani
nu tepang jeung Kangjeng Nabi

16
Sadayana sasauran
ieu jalmi mo nyalahan
pinabieun ahir jaman
Torét, Injil, geus ngiberan

17
Sipat Nabi panganggeusan
aya di anjeunna pisan
harita loba nu iman
ka Nabi ngangken panutan

18
Karesepna Kangjeng Nabi
ka Gusti Allah ngabakti
di Gunung Hira maranti,
ibadahna saban wengi.

19
Di dinya jol kasumpingan,
Jibril nu nurunkeun Kur’an,
kalawan dawuh Pangéran,
Nabi didamel utusan.

20
Harita yuswana Nabi,
patpuluh taun kawarti,
diutus ku Allah pasti,
ngémbarkeun agama suci.

21
Anu iman pangheulana,
Siti Khodijah garwana,
Abu Bakar kaduana
sohabat nu pangmulyana

22
Murangkalih nu nonoman,
anu pangheulana iman,
Sayidina Ali pisan,
ka Nabi sadérék misan.

23
Jeung ari jalma beulian,
anu pangheulana iman,
Sayid Bilal kaleresan,
anu jadi tukang adan.

24
Ari lolobana pisan
ka Nabi téh ngamusuhan,
nganiaya ngajailan,
teu aya pisan ras-rasan.

25
Nuju tanggal tujuh likur,
bulan Rajab nu kacatur,
runut kaol nu kamashur
Kangjeng Nabi téh disaur.

26
Dipapag ku malaikat,
nyandak burok nu kasebat,
leumpangna téh cara kilat,
tutunggangan Nabi angkat.

27
Ti Mekah ka Baitul Maqdis,
teu lami-lami antawis,
ku jalmi henteu katawis,
Kersana Gusti nu Wacis.

28
Ti Baétul Makdis terasna,
naék tangga saterusna,
mi’raj téa kasebatna,
ka langit Nabi sumpingna.

29
Tujuh langit sadayana,
sareng aras pangluhurna,
disumpingan sadayana,
katut surga-narakana.

30
Kangjeng Nabi ditimbalan,
ku Gusti Nu Sipat Rahman,
anjeunna kudu netepan,
solat muji ka Pangéran.

31
Sadayana jalmi iman,
sami gaduh kawajiban,
solat nu lima giliran,
henteu meunang dikurangan.

32
Solat éta minangkana,
dina agama tihangna,
jalmi nu luput solatna,
nyata rubuh agamana.

33
Kapir Mekah kacaturkeun,
barang Nabi nyarioskeun,
mi’raj lain dimulyakan,
anggur pada nyeungseurikeun.

34
Pada hasud ngakalakeun,
ti dinya Allah ngersakeun,
Kangjeng Nabi dialihkeun,
ka Madinah disirnakeun.

35
Para sohabat pirang-pirang,
nu buméla milu iang,
milu ngalih saabrulan,
henteu pisan sumoréang.

36
Tambih kamulyaan nabi,
di madinah asal sepi,
jadi ramé ku nu ngaji,
muji ka Nu Maha Suci.

37
Sapuluh taun lamina,
di Madinah jumenengna,
agama Islam cahyana,
gumebyar ka mana-mana.

38
Ari mungguh Kangjeng Nabi,
nyaahna langkung ti misti,
ka umatna jaler istri,
leuwih ti sepuh pribadi.

39
Welas asih ka nu miskin,
sumawon ka budak yatim,
pada seubeuh ku paparin,
kadaharan jeung pisalin.

40
Akurna ka urang kampung,
calik satata ngariung,
tara angkuh jeung adigung,
sanajan ka urang gunung.

41
Ka nu nandang kasusahan,
gering jeung kapapaténan,
ngalayad sarta ngubaran,
ngajajapkeun ka kuburan.

42
Manis saur manis budi,
éstu mustikaning jalmi,
sajagat mo’ mendak deui,
saé rupa jeung parangi.

43
Raray lir bulan purnama,
halisna lir katumbiri,
waos lir inten widuri,
salira harum wawangi.

44
Éstu kersaning Pangéran,
lain seungit dimenyanan,
karinget pada nandéan,
diparaké seuseungitan.

45
Pirang-pirang mujijatna,
tawis kanabianana,
Kur’an nu nomer hijina
mujijat nu pangmulyana.

46
Tangkal nu pérang daunna,
disiram urut abdasna,
ngadadak loba buahna,
sarta hirup saterasna.

47
Domba nu banget kuruna,
sarta lalépét susuna,
diusap ku pananganna,
ngadadak juuh susuna

48
Dina hiji waktos deui,
sahabat bet kirang cai,
teras baé Kangjeng Nabi,
mundut cai anu kari

49
Cai ngan sakedét pisan,
éstu kabéh pada héran,
Nabi neuleumkeun panangan,
dumadak tuluy manceran.

50
Cai mancer loba pisan,
ka luar tina panangan,
sela-sela ramo pisan,
cukup keur jalma réaan.

51
Ya Allah Nu Sipat Rohman,
abdi téh iman ka Tuhan,
teu aya deui Pangéran,
lain ti Allah Nu Héman.

52
Nu ngadamel bumi-alam,
rawuh jeung eusina pisan,
nu wajib diibadahan,
taya anu nyasamian.

53
Sareng abdi iman deui,
ka Muhammad Kangjeng Nabi,
yén éta utusan Gusti,
miwulang ka jalmi-jalmi.

54
Nu sipat kapercantenan,
wijaksana tur budiman,
bener wungkul sasauran,
lain saur kaheureuyan.

55
Hurmat urang ka anjeunna,
dina mangsa jumenengna,
sareng sabada wapatna,
éstu teu aya béntenna.

56
Duh Gusti jungjunan abdi,
Sayidina Muhammad habibi,
pamugi salira nampi,
ka nu hina diri abdi.

57
Abdi umat ahir jaman,
anu banget panasaran,
hoyong tepang ngadeuheusan,
seja tumut serah badan.

Nadhom Tauhid Bahasa Sunda - Sifat Allah Jeung Rasulna

Nadhom Tauhid

Sifat Allah Jeung Rasulna

Sifat Allah dua puluh

Mustahilna dua puluh

Nu wenangna hiji puguh

Urang wajib terangna teh

            Sifat wujud kahijina

            Hartina Allah ayana

            Mustahil Allah euweuhna

            Dalilna aya mahlukna

Sifat qidam kaduana

Tipayun teu aya mimitina

Mustahil Allah anyarna

Na surat Hadid dalilna

            Sifat baqo katiluna

            Langgeng teu aya tungtungna

            Mustahil Allah ruksakna

            Na surat rohman dalilna

Mukholafatul lilhawadisi kaopatna

Ngabedaan ka mahlukna

Mustahil nyaruaanna

Na surat syuro dalilna

            Qiyamuhubinafsihi kalimana

            Jumeneng kalawan dzatna

Mustahil Allah butuhna

Na surat imron dalilna

Wahdaniyyat kagenepna

Nunggelang taya rencangna

Mustahil bimbilanganna

Qulhu Allahu ahad dalilna

            Sifat qudrat katujuhna

            Hartina Allah kawasana

            Mustahil Allah apesna

            Na surat baqoroh dalilna

Irodat kadalapanna

Kersaan dina damelanna

Mustahil Allah apesna

Na surat buruj dalilna

            Sifat ilmu kasalapanna

            Hartina Allah uningana

            Mustahil Allah bodo na

            Na surat baqoroh dalilna

Sifat hayat kasapuluhna

Hartina Allah hirupna

Mustahil Allah maotna

Na surat baqoroh dalilna

            Sifat sama’ kasabelasna

            Hartina Allah ngadanguna

            Mustahil Allah torekna

            Na surat syuro dalilna

Bashor kadua belasna

Hartina Allah ningalina

Mustahil Allah lolongna

Na surat syuro dalilna

            Qalam katilu belasna

            Hartina Allah ngadawuhna

            Mustahil Allah pireuna

            Na surat nisa dalilna

Qodiron kaopat belasna

Allah nu Maha Kawasana

Mustahil Allah azijanna

Na sifat Qudrot dalilna

            Muridhan kalima belasna

            Allah nu Maha Kersaanna

            Mustahil Allah karihanna

            Na sifat Irodat dalilna

A’liman kagenep belasna

Allah nu Maha Uningana

Mustahil Allah Jahilanna

Na sifat Ilmu dalilna

Hayyan katujuh belasna

Allah nu Maha Hirupna

Mustahil Allah mayyitanna

Na sifat Hayyat dalilna

Sami’an kadalapan belasna

Allah nu Maha Ngadanguna

Mustahil Allah A’shomana

Na sifat Sama’ dalilna

            Bashiron kasalapa belasna

            Allah nu Maha ningalina

            Mustahil Allah ‘amana na

            Na sifat Bashor dalilna

Mutakaliman kadua puluhna

Allah nu Maha Ngadawuhna

Mustahil Allah abkama’na

Na sifat Qalam dalilna

           

Sifat wenang di Allahna

            Fi’lu mumkin autarkuhu

            Damel kumaha Allah na

            Na surat ibrohim dalilna

Sifat rosul aya opat

Mustahilna aya opat

Nu wenangna hiji tepat

Urang wajib kudu ma’rifat

            Sifat sidiq kahijina

            Hartina rosul benerna

            Mustahil rosul bohongna

            Na surat yaasiin dalilna

Amanah nu kaduana

Kabeh rosul kapercayana

Mustahil rosul cidrana

Na surat syuaro’ dalilna

Sifat rosul katiluna

Tabligh ngadugikeunnana

Mustahil rosul kitmanna

Na surat al maidah dalilna

Opat sifat fathonahna

Hartina rosul pinterna

Mustahil rosul bodona

Na surat al an’am dalilna

Sifat wenang dirosulna

Nyaeta a’rod basyariahna

Sifat kamanausiaanna

Na surat al furqon dalilna